UPU E UIGA I NEI PESE SALAMO 
O nei pese Salamo uma, sa fatuina mo le fa’amoemoe maualuga e tasi, ia mafai ona pepese ai ma vivi’i atu ai tagata Samoa i le Atua o Samoa, ma le lalolagi atoa.  O le fa’amanu, o le fa’afetai ma le vivi’i i le Atua, o le agaga aopito maualuga lea ma fa’asilisiliina i lo’u loto ma lo’u agaga; ma o le mafua’aga lea ma le pogai lea e tasi, na fatuina ai nei pese Salamo uma.   
Atonu po o le agaga lava fo’i lea ma le lagona sa ia Tavita i aso anamua, sa ia fatuina ai lana pese ma ia fa’apea ane ai:   
“Lo’u agaga e, ia e fa’amanu atu i le Ali’i, o mea uma fo’i o i totonu ia te a’u ia fa’amanu i Lona Suafa Pa’ia.  Lo’u agaga e, ia e fa’amanu atu i le Ali’i, aua fo’i ne’i galo se mea e tasi o Ana mea alofa.”  (Salamo 104:1,2)   
O mea uma sa ia Tavita I lona mafaufau, lona tino, fa’apea ma lona agaga, o lona uiga o mea uma lava na mafua ai, ma mafai ai ona ola Tavita, “ia fa’amanu, ia fa’afetai, ia vivi’i ma fa’ane’ene’e atu i le Ali’i.”  O le agaga fo’i lena ma se lagona ia te a’u le auauna fa’atauva’a, na mafua ai ma pogai ai ona ou fatuina nei pese Salamo.  
O la’u tatalo ma le agaga maualalo lava, se’i fa’apena ona tatou lagona fa’atasi o lea lava agaga fa’amanu, le agaga fa’afetai, a’o tatou pepese fa’atasi i nei Pese Salamo, tatou te vivi’i fa’atasi ai ma fa’ane’ene’eina fa’atasi le Ali’i lo tatou Atua, i nei Pese Salamo uma.   
Tatou te pepese fa’atasi ai e fai ma fa’ailoga, o lo tatou alolofa atu i le Ali’i lo tatou Atua, ma lo tatou le fa’agaloina o Sana mea alofa e tasi, i o tatou olaga ta’ito’atasi.   
Ia fa’amanuia mai le Atua iai tatou uma ta’ito’atasi.   
Soifua ma ia Manuia 

Ioselani Pouesi

Purchase e-book (Vol.2): https://pouesimusicstore.com/hymn-books